PACARAN DENGAN SARI

Ada seorang mama yang tinggal di pinggiran kampung bersama de pu anak laki-laki umur 30 tahun bernama Yakobus. Karna Mama ini lihat de pu anak laki-laki su berumur 30 tahun tapi belum kawin apalagi pu pacar jadi mace langsung tanya :

MAMA : eh....Yakobus, ko tinggal selama ini sampe su umur 30 tahun begini ko tra pernah cari pacar supaya ko bisa kawin kah ?

YAKOBUS : ah...mama, sebenarnya sa pu pacar su ada dari dulu tapi sa tra mo kastau mama dulu !

MAMA : iyo kah ? Ko pu pacar nama siapa baru de tinggal di mana ?

YAKOBUS : Sa punya pacar itu de pu nama SARI tinggal di kampung sebelah !

MAMA : Oh...mama tau. berarti Sari itu de pu bapa yang namanya Iskandar to ?

YAKOBUS : ah...mama, bukan sari yang bapa Iskandar pu anak itu !

MAMA : bah...semua orang di kampung sebelah itu mama kenal semua. Cuma ada satu nama sari di kampung itu. Baru yang ko maksud itu Sari yang mana ? coba ko sebut de pu nama lengkap, pasti mama kenal !

YAKOBUS : adooo...begini, sa kastau tapi mama jangan marah e...?

MAMA : iyo...ko kastau cepat sudah, ko jangan bikin mama penasaran begini !

YAKOBUS : Sa pu pacar de pu nama lengkap itu SARIFUDIN anaknya bapa Jamaludin !

MAMA : Astagaaaaa...Yakobus ko su gila kah ? Masa ko pacar dengan manusia stengah kopleng itu (BENCONG)